ប្រវត្តិបទ "ស្ពានអូរតាគី"
នៅតាមផ្លូវ ចាប់តាំងពីស្ពានអូរតាគី រហូតទៅដល់មង្គលបុរី សេរីសោភ័ណ សុទ្ធជាកន្លែងដែល បានកត់ត្រាទុកនូវអនុស្សាវរីយ៍ និងរឿងរ៉ាវផ្សេងៗ ដែលជីវិតស្នេហាបឋមវ័យរបស់លោកគង្គ ប៊ុនឈឿន បានជួបប្រទះ ។
ជាមួយគ្នានេះដែរ លោកគង្គ ប៊ុនឈឿនបានដក់ចិត្តដិតអារម្មណ៍ទៅលើជីវិតកម្មកររថភ្លើង ដែល ផ្ញើវាសនាលើផ្លូវដែកដ៏កម្សត់ទុរគត។
ថ្វីបើបទ“ស្ពានអូរតាគី” គ្មានពាក្យបឹងព្រីងមួយម៉ាត់នៅជាមួយ ប៉ុន្តែគឺលោកគង្គ ប៊ុនឈឿនមាន គោលបំណងរំលឹកទៅដល់ភូមិឋានទាំងនោះ ចាប់តាំងពីស្ពានអូរតាគីឡើងទៅ ព្រោះស្ពាននេះជាទីតាំង ពិតប្រាកដនៃជីវិតស្នេហារបស់លោក ដែលបើទុកណាជាមិនបានសម្រេចដូចបំណង ក៏បានឋិតនៅក្នុងក្តី ស្រមៃគ្មានព្រំដែនមួយ ដែលពោរពេញទៅដោយក្តីអស់សង្ឃឹម...។
បទនេះ លោកគង្គ ប៊ុនឈឿនចាប់និពន្ធនិងថតនៅក្នុងអំឡុងពេលវេលាជាមួយបទ កំលោះហុង ដាកញ្ញាប៉េសេ ហើយនៅតែមានប្រជាប្រិយភាពរហូតមកដល់សព្វថ្ងៃនេះ...។
ស្ពានអូរតាគី
បទភ្លេងទំនុកច្រៀង៖ គង្គ ប៊ុនឈឿន
សម្រួលតន្ត្រី៖ ហាស់ សាឡន
ច្រៀងដោយ៖ ស៊ីន ស៊ីសាមុត
សូមជួបលាក់ផង កុំប្រាប់អ្នកណាឱ្យសោះ!...
នឹកឡើងសែនខ្មាស់ ស្ពានអូរតាគី
កាលបងនិងអូនសាងក្បូនជីវី កាលបងនិងអូនសាងក្បូនជីវី
ក្រោមដើមគគីរ ក្នុងខ្ទមទុរគត ។
គ្មានផ្ញើសម្តី ឱ្យបងមួយម៉ាត់
បងជាកម្មកររថភ្លើងកម្សត់ បងជាកម្មកររថភ្លើងកម្សត់
លួចផ្ញើសំបុត្រ តាមអ្នករត់ពន្ធ ។
ជីវិតខ្ញុំអើយ ទុក្ខស្នេហ៍សែនធ្ងន់
ម្តាយអូនជេរផ្ញើតាមអ្នករត់ពន្ធ ម្តាយអូនជេរផ្ញើតាមអ្នករត់ពន្ធ
មើលងាយរិះគន់ ថាបងក្រខ្លាំង ។
ឱពពាលខែ និងស្រែបារាំង
បើដឹងរឿងខ្ញុំសូមជួយបិទបាំង បើដឹងរឿងខ្ញុំសូមជួយបិទបាំង
ធ្វើជារនាំង បាំងស្នេហ៍នេះផង ។
0 comments:
Post a Comment