ប្រវត្តិដើម
កាលពីឆ្នាំ១៩៦៦ លោកគង្គ ប៊ុនឈឿន បានសរសេរប្រលោមលោកមួយឈ្មោះថា“អារសាច់ជូនម្តាយ” ផ្សាយក្នុងទំព័រសារព័ត៌មាន“សុវណ្ណភូមិ” ដែលកាលណោះ លោកគង់ ប៊ុនឈឿន ជាអ្នកនិពន្ធប្រចាំសារព័ត៌មាន នេះ ហើយក្រោយឆ្នាំ១៩៧០ លោកក៏ជានិពន្ធនាយក និងជាចាងហ្វាងនយោបាយប្រចាំសារព័ត៌មាននេះទៀតផង។ ដោយសាររឿង“អារសាច់ជូនម្តាយ”នេះ ជាប្រលោមលោកផ្នែកជីវិតសោក ដែលទាក់ទាញអារម្មណ៍អ្នក អានទូទៅ ទើបនៅឆ្នាំ១៩៦៧-៦៨ លោកកា ឆាយលាង ហៅសារ៉ាវុធ ដែលជាចាងហ្វាងផលិតកម្មប្រាសាទមាស ភាពយន្ត បានទាក់ទងសុំទិញសិទ្ធិរឿងអារសាច់ជូនម្តាយពីលោកគង្គ ប៊ុនឈឿន យកទៅថតជាខ្សែភាពយន្ត។
ដោយយល់ឃើញថា លោកគង្គ ប៊ុនឈឿន ជាម្ចាស់រឿងនេះ លោកសារ៉ាវុធបានសំណូមពរឱ្យលោកគង្គ ប៊ុនឈឿនតាក់តែងបទចម្រៀងពីរបទ សម្រាប់បញ្ចូលទៅក្នុងខ្សែភាពយន្តរឿងនេះ ទីមួយបទ“អារសាច់ជូន ម្តាយ” និងទី២បទ“រសស្នេហ៍ឧត្តម” ។
ក្រោយពីបានតាក់តែង ទាំងបទ ទាំងទំនុកច្រៀងរួចហើយ លោកគង្គ ប៊ុនឈឿន ក៏បានប្រគល់ឱ្យលោក ហាស់ សាឡន ធ្វើ ARRANGEMENT និងដឹកនាំវង់តន្ត្រីចម្រុះមួយ ដែលមានលោកស៊ីន ស៊ីសាមុត និងអ្នកស្រីរស់ សេរីសុទ្ធា ជាអ្នកបកស្រាយមនោសញ្ចោតនា ។
លោកគង្គ ប៊ុនឈឿន បាននិយាយថា“ខ្ញុំនៅចាំបានថា នៅពេលថតបទអារសាច់ជូនម្តាយនៅក្នុងស្ទីឌីយោ របស់អ្នកស្រីវ័ណ ចន្ទ លោកស៊ីន ស៊ីសាមុតមានការនឿយហត់ខ្លាំង ក្នុងការច្រៀងបទនេះ គឺថតចំនួន១១ដង ទើប សម្រេចជាការបាន ដោយមេឡូឌីរបស់បទនេះ មានទំនួលតឹងពិបាកច្រៀង ហើយរវល់តែខុសនេះ ខុសនោះមិនចេះ ចប់ ។ នៅ CODA ចុងក្រោយ លោកស៊ីន សាមុតខំស្រែកទាល់តែហើបជើងពីដី ទើបដល់តុងដែលត្រូវយក ។ ពេល នោះខ្ញុំឃើញខ្នងគាត់បែកញើសរហាម ព្រោះទម្លាប់របស់គាត់ ពេលច្រៀងនៅក្នុងស្ទីឧីយោ គាត់មិពិក់អាវទេ គឺ ដៃទាំងពីរកាន់ម៉ុងដូលីន និងត្រេះសង្វាក់ជាប់ជានិច្ច ឯភ្នែករំពៃតាមដានមើល NOTE ABCD និងទំនុកច្រៀង ដែលដាក់ នៅលើ PORTE-NOTE ឥតខ្ចោះ” ។
ដោយសារបទអារសាច់ជូនម្តាយ មានខ្លឹមសាររិះគន់ជីវិតនៃស្នេហាប្រកាន់វណ្ណៈ ទើបនៅពេលចាក់ផ្សាយ ក្នុងខ្សែភាពយន្ត ធ្វើឱ្យអ្នកស្តាប់គ្រប់មជ្ឈដ្ឋានភ្ញាក់ផ្អើល និងចាប់អារម្មណ៍ជាខ្លាំង ហើយល្បីល្បាញជ្រាបចូលក្នុង មនោសញ្ចោតនារបស់ទស្សនិកជនយ៉ាងរហ័សជាទីបំផុត ពិសេសគឺស្រទាប់យុវវ័យ ។
លោកគង្គ ប៊ុនឈឿន បានសារភាពដោយត្រង់ថា នៅពេលថតចប់ភ្លាម លោកមានការបារម្ភក្រែងបទ អារសាច់ជូនម្តាយចេញមិនរួច ព្រោះប៉ះពាល់ដល់ភាពគ្រោតគ្រាតរបស់សង្គមមនុស្សនាសម័យនោះ ចំៗពេក។ ប៉ុន្តែ ដោយហេតុថា ចុងប៉ាការបស់លោកមានសច្ចៈធម៌ពិតប្រាកដ ទើបបទនេះបានហូរចេញពីបេះដូងរបស់លោក ទៅបម្រើអ្នកស្តាប់ខ្មែរទាំងអស់ ដោយគ្មានអ្វីរារាំងទប់ស្កាត់បានឡើយ ។
តាមរយៈសំឡេងមាសរបស់លោកស៊ីន ស៊ីសាមុត បទនេះ បានស្ថិតនៅជានិច្ចក្នុងដួងចិត្តប្រជាជនខ្មែរ រហូតមកដល់ពេលបច្ចុប្បន្ន ។ មិនតែប៉ុណ្ណោះ បទនេះបានធ្វើឱ្យកម្រើករំជួយដល់មនោសញ្ចោតនារបស់យុវវ័យ ជំនាន់ក្រោយទៀត តាមរយៈការថតបញ្ចូលក្នុងខ្សែវីដេអូរឿង“ព្រះគុណម៉ែ” ឬ “អារសាច់ជូនម្តាយ” ដែលលោក គង្គ ប៊ុនឈឿនរៀបចំផលិតឡើងសាជាថ្មី ដើម្បីឧទ្ទិសដល់អតីតកាលដ៏គួរឱ្យសោកស្តាយនោះ ។
មានអ្នកស្តាប់ខ្លះឆ្ងល់ ហើយសួរលោកគង្គ ប៊ុនឈឿនថា ហេតុម្តេចក៏ INTRODUCTION របស់បទ អារសាច់ជូនម្តាយ មានស្រែកថា“កូនសូមអារសាច់ជូនម៉ែ”ផង និង“កូនសូមអារសាច់ជូនម្តាយ”ថែមទៀត?
លោកគង្គ ប៊ុនឈឿន បានបំភ្លឺថា មុនដំបូងឃ្លាដែលស្រែកថា“កូនសូមអារសាច់ជូនម៉ែ!...” នោះគឺតួអង្គ ស្រែកចំពោះម្តាយរបស់ខ្លួន ឯឃ្លាទីពីរ ដែលថា“អារសាច់ជូនម្តាយ”នោះ គឺតួអង្គខំស្រែកប្រកាសចំពោះពិភពផែន ដីទាំងមូល ។ នេះជាស្ទីលរបស់អ្នកនិពន្ធ ដែលធ្វើឱ្យសាច់បទកាន់តែមានមនោសញ្ចោតនាជ្រាលជ្រៅខ្លាំងឡើង និង ប្លែកពីគេ...។
0 comments:
Post a Comment